SPAZI SPESCHA – AVERTURA ILS 17 DA ZERCLADUR 2023
RELASCH DA MATIAS SPESCHA
Il schaner 2023 han ils artavels da Matias Spescha (1925–2008) surdau siu relasch artistic en fuorma d'ina donaziun alla fundaziun OGNA.
SPAZI SPESCHA
En stretga collaboraziun cun l'uniun TRUN CULTURA vegnan naven dils 17 da zercladur 2023 pliras ovras ord siu vast relasch presentadas alla publicitad. Ella gronda halla industriala da 1000m2 han duront la stad mintgamai exposiziuns liug che muossan lavurs da Spescha en zun differents contexts.
Cheu ha Matias Spescha a lezzas uras fatg siu emprendissadi sco tagliader/cusunz e luvrau sco menader dalla partiziun avon ch'el ei sedecidius da daventar artist.
AVERTURA DALL' EXPOSIZIUN
17 DA ZERCLADUR – 29 D'OCTOBER 2023
RETUORN A TRUN – RETUORN A CASA
«En sesez fuss il pli ault nivel digl art contonschius, sche mi'ovra restass anavos leu nua che jeu erel, cura che jeu partel.» (Matias Spescha, 2006)
Il giavisch da Matias Spescha ch'el ha exprimiu dus onns avon sia mort, ei daventaus cumpleinamein realitad. Suenter che siu project a cor, la sculptura monumentala OGNA sut tschiel aviert,
ei vegnida realisada igl onn 2013 a Trun, anfla precis 10 onns pli tard il relasch da siu art sia nova dimora ella patria digl artist. Per quei intent ha l'uniun Trun Cultura affitau ina
gronda e clara halla ell'anteriura fabrica da ponn e preparau ella per l'exposiziun da sias ovras.
L'exposiziun d'avertura el SPAZI SPESCHA, areal da fabrica 13 a Trun, presenta Matias Spescha sco quei ch'ins ha aunc mai viu en Svizra.
TRUN CULTURA
Tiegl ensembel da Trun Cultura sesanfla era la CASA CARIGIET che duei suenter il barschament vegnir reconstruida ed aviarta per la publicitad. Ils enconuschents fargliuns Alois e Zarli Carigiet daventan en lur casa paterna la basa per ina debatta cun art, film e cultura.
Era la CASA DESAX sauda tiegl ensembel. Ella sesanfla en pintga distanza denter la CASA CARIGIET ed il SPAZI SPESCHA e duei daventar albiert e casa da litteratura
Ensemen cun il Museum Sursilvan Cuort Ligia Grischa, l'OGNA ed la senda d'art seviluppescha el cor dalla Surselva in center cultural cul potenzial da carmalar neutier visitaders naziunals ed internaziunals.