fuorma unica
En ina serraria a Winterthur anfla igl artist Matias Spescha 1996 in bischel da fier. El lai tagliar il bischel empermiez e silsuenter lutiar ils dus tocs danovamein ensemen, denton spustau.
Quella fuorma fascinonta vul el realisar sco gronda plastica transibla da betun.
.
agl ur digl uaul dall'ogna
Si'idea anfla sustegn. Aschia concretisescha Matias Spescha il project ensemen cun architects e semetta alla tscherca d'in liug adattau. Persunas enconuschentas fuorman in comité da
patrunadi.
La vischnaunca da Trun – liug nativ digl artist – signalisescha interess e metta a disposiziun in sulom agl ur digl uaul d'ogna. OGNA daventa purtadra dil num per sia davos e pli gronda ovra.
ovra postuma
L'entschatta 2008 semetta il comité alla lavur da finanziaziun. Amiez quellas stentas miera Matias Spescha nunspitgadamein il zercladur 2008. Collavuraturs ed artavels ein unanimamein dil meini da realisar quell'ovra unica e senza paregl. Per quei motiv vegn la fundaziun OGNA fundada. Ella surpren suenter la mort digl artist l'incarica da realisaziun.
Ils 1 da matg 2012 succeda l'emprema badelada ed ils 4 da matg 2013 ha l'inauguraziun dalla sculptura liug. Dapi lu eis ella tut il temps accessibla a visitaders.