MIDADA ELL'ABSTRACZIUN

Suenter sia midada tumpriva dil naturalissem vi ell'abstracziun che Matias Spescha exequescha a Paris, anfla el gia 1959, cuort suenter sia bardigliada el vitg da Bagess ella Frontscha dil sid, si'atgna fuorma da s'exprimer, la quala el persequitescha nunindulgentamein e cun strentga consequenza entochen sia mort e la quala el sviluppescha vinavon ord ina logica interna.

Sia rolla dubla sco artist renconuschiu e sco doyen d'ina generaziun pli giuvna procuran ad el per in plaz incontestabel egl art contemporan svizzer. 

DIL MALETG ALLA SCULPTURA

Entuorn ils onns 1970 realisescha Matias Spescha il pass viers la sculptura, resta denton el medem temps fideivels alla pictura ed alla grafica da stampa. Cun l'integraziun dalla tiarza dimensiun survegn il spazi per el pli e pli grond'impurtonza. El daventa in tema da basa: «Il liug da sia pictura ei la transiziun dil spazi real el suggestiv, il viadi digl exteriur egl interiur. Sia pictura ei in art dalla transcendenza.» (Matthias Frehner en: Matias Spescha, Monografie 2000).

Quei svilup enviers in'abstraziun che para cuntinuadamein ascetica, che arva al contemplader el spazi ina nova dimensiun e lai daventar el aschia ina part «dall'ovra d'art», semuossa adina pli e pli marcantamein en projects tardivs sco en L.A.C., ina installaziun el Lieu d'Art Contemporain (2001 a Sigean, Frontscha).

Cun l'OGNA creescha Matias Spescha siu spazi elaboraus en davosa consequenza e lai separticipar nus sco presents a tal. 

Beat Stutzer, anteriur directur dil museum d'art Cuera, broschura OGNA 2007